Vrasja e 53-vjeçarit Massimo Garitta mbetet ende e paqartë plotësisht edhe pas marrjes së përgjegjësisë nga 24-vjeçarja, Aurela Perhati për kryerjen e saj. Edhe pas dëshmisë së Aurelës, autoritetet italiane pyesin ende se pse ajo duhet të merrte në makinë një të panjohur si Garitta, i cili njihej si lypës e përdorues droge.
Luca Amario, avokat i vajzës në një intervistë radiofonike ka treguar versionin e Perhatit.
“Ishte një ngjarje tragjike dhe fatkeqe. Perhati është shprehur se çdo gjë e bëri për t’iu shmangur tentativës për dhunë seksuale. Ishte vetë ajo që ia sqaroi hetuesve se Garitta i kishte pantallonat e ulura. Dhe ky është një element i rëndë që askush s’e ka përmendur, por që në fakt e ka tronditur vazjën. Aurela ka deklaruar se ka mundur të dalë nga makina bashkë me të. Dhe kur e pa veten në një pozitë më të mirë se sa viktima, ajo i ka dhënë makinës shpejt për t’u larguar, por ndërkohë ishte errësirë dhe e ka përplasur atë pasi nuk e ka parë,” tregon avokati.
Ngjarja e rëndë ndodhi natën e ndërrimit të viteve, ku 24-vjeçarja shqiptare Perhati akuzohet për vrasjen e 53-vjeçarit italian.
