“Kjo qeveri është në grahmat e fundit dhe do të rrëzohet përsëri”. Kështu i komenton ish-kryeministri Sali Berisha ndryshimet e fundit në qeveri. Në një intervistë në studion e “Ora News”, Berisha bëri akuza të forta ndaj Belinda Ballukut, që zëvendëson Damian Gjiknurin në krye të ministrisë së Transporteve dhe Energjisë dhe Gent Cakajt, i zgjedhur nga Rama ministër për Europën dhe Punët e Jashtme, në vend të Ditmir Bushatit. Gjithsesi Berisha e vlerësoi Bushatin për qëndrimin e tij për mos ndryshimin e kufijve Kosovë-Serbi. Më poshtë skaneri i Berishës për qeverinë e re.
Disa nga batutat e Berishës për ministrat e rinj
Anila Demaj
“Ra qeveria. Çfarë solli në qeveri ky? Solli hiçin, pothuajse negativ. Jua dha financat një personi që falimentoi Fondin e Sigurimeve Shëndetësore vetëm e vetëm se është shoqëri e madam Bahës. Asnjë meritë nuk ka ajo zonja Demaj se shikoni farmacitë, s’kanë marrë paratë e rimburësimeve. Janë në falimentim për shkak të fondit”.
Belinda Balluku
“Mori po Belindën, shoqëruesen e Riformatos që e kalonte Riformaton pa kontrolle, pa chek-up-e, për transportin e drogës e me radhë. Balluku ka shoqëruar Riformaton i cili nuk rezulton në sistemim TIMS. Kush e nxori nga sistemi TIMS? Se Riformato nga Rinasi u nis”.
Erion Braçe
“Zgjodhi Erjon Braçen… Kur unë denoncova avionët që uleshin në rrugën e fshatit Bedat, se unë e dija se kisha qenë, Erion Braçe në parlament tha: “S’ka rrugë fare në Bedat, ndërkohe që ajo rrugë përdorej si pistë avioni por ku e fshihte për Kokoneshin, seç është një trafikant kryetar bashkie”.
Gent Cakaj
Gent Cakaj një “pjon i Baton Haxhiut”. Ky i fundit “argat i fshehtë i Beogradit në Prishtinë”. Cakaj u vu në këtë post se është mbështetës i ndarjes së Kosovës. Kjo është fatkeqësi e madhe që diplomacia e këtij vendi uzurpohet nga një individ si ky. Ky zotëri përfaqëson më shumë se këdo tjetër Beogradin, argatin e fshehtë Baton Haxhinë, që në fakt është edhe shefi i argatëve të Beogradit në Prishtinë”.
Ditmir Bushati
“Ditzi Bushati ka qenë katastrofal për sa i përket marrëveshjes me Greqinë, por ai ka mbajtur qëndrim konkret për sa i përket mos ndryshimit të kufijve. Dhe kjo është e vërteta. Kurse në aspekte të tjera ai ka qenë larg atij posti sa këtu e në hënë me thënë është pak. Ai ishte i lidhur, me fakte, me bandat më të rrezikshme në Shkodër. Dhe një ministër i Jashtëm që ishte i lidhur me bandat se kishte vendin në ministri të Jashtme, por te bandat. Por, kjo nuk më pengon të them, që ai në çështjen e ndryshimit të kufijve pati instinktin politik për t’iu kundërvu haptaz”.
