Gjykata e Tiranës ka përfunduar shqyrtimin e padisë për “shpifje” të kreut të grupit parlamentar socialist, Taulant Balla, kundër Lulzim Bashës.
Avokatët e Ballës kërkuan deklarimin fajtor të kryetarit të PD dhe dënimin e tij për “shpifje”.
Avokatët e Bashës pretenduan se në deklaratat e tij nuk ka elemente të veprës penale. Ata kërkuan përfundimisht pafajësinë e Bashës ose pushim të çështjes.
Përfaqesuesi i prokurorisë në gjyq tha se nuk ka elementë të veprës penale dhe kërkoi përfundimisht pushimin e padisë.
Gjyqtari Gerd Hoxha pasi doli nga Dhoma e Këshillimit deklaroi se i nevojitet më shumë kohë për të shpallur vendimin dhe caktoi si datë të radhës 21 janarin.
Balla paditi në gjykatë Bashën pasi ky i fundit akuzonte kreun e grupit të PS se ishte i përfshirë në 3.4 milionë eurot që u gjetën në 2 makina Toyota yaris në Portin e Durrësit.
Padia e dytë për të cilën akuzohet Basha është ajo për dekonspirimin e aksionit të policsë pasi ai tha në parlament se drejt Shqipërisë ishte nisur një shumë e madhe parash brenda një automjeti Toyota Yaris ngjyrë e kuqe.
Pikërisht kjo deklaratë ndryshoi planet e operacionit kriminal të Alfred dhe Elvis Vladit. Makinat supozoheshin të niseshin nga porti Ankonës por devijuan rrugën dhe u nisën nga porti i Barit. Më herët Gjykata e Krimeve të Rënda ka lënë në burg pa afat katër personat e arrestuar pas kapjes në portin e Durrësit, Edi e Klevis Lika, Alban Mollaymeri dhe Agim Çeka. Ndërkohë Alfred dhe Elvis Vladi janë shpallur në kërkim. ©Lapsi.al
