Dhunimi dhe grabitja e kambistit Mustafa Mustafai dhe bashkëshortes së tij Thëllëza në qytetin e Memaliajt mbrëmjen e sotme, është seria e fundit e katër ngjarjeve të tjera kriminale që kanë ndodhur brenda dy ditëve të fundit. Kujtojmë se më datë 20 janar, në Tepelenë, persona të maskuar grabitën tre biznese: Supermarket ‘ZENELI’, dyqan bulmeti ‘ALIKO’ dhe pasticeri ‘DERVISHI’.
Në supermarket morën me vete dhe sistemin e kamerave të sigurisë për të humbur gjurmët. Mësohet se shuma e vjedhur ishte rreth 600 mijë lekë, plus edhe paketa cigaresh me vlerë 5 milionë lekë. Ndërkohë kambistit në Memaliaj iu morën 50 mijë lekë të reja dhe një aparat celular. Të katërta këto ngjarje kriminale kanë një të përbashkët; janë pa autorë dhe kanë ndodhur brenda dy ditësh.
Kjo ngre shumë pikëpyetje për punën e Policisë së Shtetit në qarkun Gjirokastër dhe cënon sigurinë publike. Kur brenda dy ditësh kemi katër grabitje dhe asnjë të arrestuar, kjo rrit pasigurinë tek qytetarët dhe vë në dyshim efektivitetin e punës së policisë.
