Çarja e digave të rezervuareve rrezikon përmbytjen e disa fshatrave. Ministria e Energjitikës në raportimin në parlament, ka paraqitur një raport për 640 digat, ku pjesa më e madhe e tyre rezultojnë jo të mirëmbajtura. Pavarësisht ndërhyrjeve të bëra deri më tani, situata konsiderohet alarmante.
Zonat e banuara pranë digave të rezervuarëve janë të rrezikuara nga përmbytjet. Madje në komisionin parlamentar të veprimtarisë prodhuese ministria e Infrastrukturës dhe Energjetikës e ka cilësuar situatën emergjente.
'Ka ndërtime me leje, pa leje qe e ndërlikojne situatën. Por ai studimi që do bëhet nga Komiteti Kombëtar i Digave do përcaktojë se në cilat diga duhet ndërhyrë', shprehet Agim Bregasi, Drejtor në Ministrinë e Infrastrukturës dhe Energjisë
Në total janë 640 diga në të gjithë vendin dhe thuajse në të gjithë rastet rezulton se janë të amortizuara. Fondet e dhëna gjatë këtyre viteve nuk kanë dhënë efeke.
'Në dijeninë time për këto diga BB ka bërë një studim dhe është ndërhyrë në 12 diga. Do të bëhet një verifikim i gjithë situatës.'tha Bregasi.
Edhe deputetë të majtë kërkuan një skanim të situatës .
Tatja Nurçe Deputete e PS: Rezervuari i Kasharit ka një problem shumë të madh që është pranë familjeve dhe merr përpara fshatin deri tek hekurudhat.
Ilir Beqaj: Situata e digave është më komplekse në Shqipëri. Unë mendoj se ju keni për detyrë parësore ta rishikoni këtë rregullore.
Me ndarjen e re territoriale rezervuaret janë në administrimin e bashkive. Por për shkak të mungesës së fondeve nuk janë parashikuar investime në mirëmbajtjen e tyre.
