“Më vjen keq që pashë një episod të tillë. Veprova në mënyrë instiktive, sepse nuk mund të lejoja të cënohej një njeri në atë mënyrë, pavarësisht se nuk isha dakord me vendimin e tij”. Me këto fjalë, një ditë pas agresionit në Kamëz, në përfundim të ndeshjes me Lacin, ku është dhunuar arbitri Eldorjan Hamiti, tekniku i Kamzës, Gentian Stojku, flet për momentin ku gjendja doli jashtë kontrollit. Tifozët të irituar nga penalltia e akorduar në sekondën e fundit të kohës shtesë, janë futur në fushë duke goditur arbitrin.
Një situatë që për Stojkun mund të ishte administruar ndryshe, duke qenë se ende edhe pas përsëritjeve nuk është i qartë nëse është penallti. “Shtoi pesë minuta lojë dhe nuk ishte ndaluar aspak loja gjatë 90 minutave – shpjegoi Stojku -. Pastaj akordoi një penallti që më vjen keq ta them, edhe tani kur e shoh nuk jam i qartë përse është penallti”
Sigurisht që situata për Kamzën tani ndërlikohet, duke qenë se zona e shpëtimit është 8 pikë larg. “Gjendja është e vështirë, pa harruar se presidenti është ende i ndaluar. Nuk di si ta karikoj skuadrën, sepse nuk na lejohet asnjë shpërqendrim” theksoi Stojku. Në javët e mbetura vetëm një mrekulli mund të përmbysë situatën, duke qenë se skuadra e Stojkut është në vendin e fundit dhe skuadrat që duhet të humbasin pikë ajnë dy. Megjithatë, Stojku prêt ti marrë ndeshjet me radhë, duke nisur nga transferta me Luftëtarin, që vendos gjithcka në rast humbje për Kamzën.
