Ishte mes dhjetori kur Ardit Gjebrea riktheu në skenë kantautorin e njohur Pirro Çako, në “Kënga Magjike 2018”, me një homazh kushtuar babait të tij Gaqo Çako.
Nga performanca e ndjerë kuptuam se na kishte marrë malli vërtet për zërin e Pirro Çakos dhe muzikën e tij.
Bashkëpunimi me Elvana Gjatën në krijimin e albumit “3” një vit më parë solli vargjet dhe muzikën e mrekullueshme të Pirro Çakos, por u desh një baladë me Xhensila Myrtezajn që ai t’i rikthehej fuqishëm muzikës si kantautor, me talentin që nuk i shteron kurrë.
Për këngën “Sekreti im”, Pirros iu deshën 3 vite punë dhe e besojmë këtë kur dëgjojmë vargjet e ndjera mbi dashurinë, që i burojnë nga thellësia e zemrës dhe tashmë nuk janë më një sekret! Kënga kushtuar dashurisë sjell ato ndjenjat e rralla që përjetohen kur do vërtet, me mornicat, fluturat dhe 1001 mendimet që të tundojnë:
“Në hapësirën time më intimeKu veç Zotit s’hyn njeri
Rreze dielli je për mua vetëm ti,
Po mi ngroh të gjitha dhomat
Në çdo cep të zemrës sime
Ma tundove me 1001 mendime..”
Vetë Pirro e cilësoi rikthimin si kantautor pas 7 vitesh, si të vonë, por kot nuk thonë, “më mirë vonë sesa kurrë!”
Teksa shohim sesa shumë është shpërndarë kjo këngë nga artistët dhe adhuruesit e muzikës, mund të themi se rikthimi i Pirro Çakos ishte ai që i duhej muzikës shqiptare në një kohë që po prodhohet më tepër material për t’u parë, sesa për t’u dëgjuar.
Në një reagim të tijin në Instagram, një ditë pas publikimit të këngës, kantautori Pirro Çako ka folur për rikthimin dhe ka falënderuar bashkëpunëtorët Xhensila Myrtezaj dhe Darko Dimitrov:
“Sekreti im është kënga që më rikthehu pranë jush pas 7 vitesh si kantautor. Më mirë vonë, sesa kurrë!Falenderoj përzemërsisht @xhensilamyrtezaj , që me zërin e saj i dha emocion dhe e zbukuroi akoma edhe më shumë këtë këngë. Gjithashtu falenderoj @darkodimitrov që ndër vite ka qenë faktor determinant në projektet e mia”.
Ndërsa ne nuk na mbetet gjë tjetër veçse të të falenderojmë ty Pirro, që na kujton se muzika në Shqipëri është e bukur dhe ne jemi të bekuar!
https://www.youtube.com/watch?v=xZWvueiHfaU
