Keith Flint, u gjet dje i pajetë në shtëpinë e tij në Essex duke lënë kështu botën e muzikës në shok. Vdekja e 49 vjeçarit u konfirmua fillimisht nga policia, të cilët e klasifikuan këtë ngjarje si “jo të dyshimtë”, megjithëse një shkak zyrtar ende nuk është dhënë.
Nga ana tjetër, shoku i tij i grupit Liam Howlett bëri me dije se Flint kishte kryer vetëvrasje. Madje mësohet se vokalisti i Prodigy prej disa kohësh ka qenë duke luftuar me depresionin për shkak të ndarjes nga ish-gruaja Mayumi Kai. Ai kishte nxjerrë dhe shtëpinë e tij në shitje në Essex, shumë pak ditë para se të gjendej aty i pajetë. Burime pranë familjes së artisti tregojnë se Keith ishte në depression që pas ndarjes nga DJ Mayumi, me të cilën kishte qenë i martuar që në vitin 2006. Në intervista të ndryshme ai shprehej se gruaja e tij i kishte shpëtuar jetën dhe gjithashtu e kishte ndihmuar shumë në betejën e tij me alkoolin dhe drogën.
