Kujtimi i Ali Memës, në tributin special të bardhebluve në kujtim të virtuozit të mesfushës dhe lotët e të birit Ardian Mema, që nuk mund të ishte në pnakinë i skualifikuar, ishin paralajmërimi i një mbrëmje të hidhur në Selman Stërmasi. Tirana hedh poshtë fitoren në minutën e 99 e arritur nga një Lac kurajoz e me 10 lojtarë: Bardheblutë mund të kishin mbyllur ndeshjen në disa raste, por Hasani gaboi nga pika e bardhë e penalltisë, Halili përdori dorën për të kaluar Selmanin dhe në frymën e fundit Xhixha barazoi duke futur bardheblutë edhe një herë në drithërimat e mbijtesës.
E të mendosh që Tirana dominoi fushën në formacionin tip, ku ishte përfshirë edhe Halili, pavarësisht se sinjalin e parë e dha Laci i Starovës, i karikuar nga barazimi në debutim dhe një detyrim fitore për të kthyer entuziazmin në Kurbin. 90 minuta të vështira për teknikët, me tre zëvendësime të detyruara, që komplikuan lojën e zgjedhur: Fangaj mori vendin e Domgjonit, Sentamu të Ngo’o dhe Goxha të Turtullit.
Në dhomat e zhveshjes kryeqytetasit shkojnë në avantazh, me Sentamun që shënon pas 6 minutash në fushë. Rezultati logjik i asaj që prodhuan skuadrat në pjesën e parë, por Starova nuk është absolutisht dakord me këtë, ndaj dhe preferon të rinisë me Najdenov, për të forcuar ofensivën. Idetë e ish-teknikut bardheblu rrezikuan të hidhen në erë në një faull të pamenduar mirë të Sefgjinit ndaj Halilit në minutën e 53. Për Metën nuk kishte dyshime se ishte penallti, por edhe Selmani nuk kishte dyshime në aftësitë e tij, duke treguar motivin pse është portieri i U21 kur bllokoi goditjen e Hasanit. Tiranës i del cdo skemë, por ndoshta drithërima e shkaktuar nga e djathta e Jonuzit duhej ti kishte bërë më të kudjesshëm bardheblutë, por ndoshta edhe kartoni i kuq i Najdenov, për një faull të shëmtuar ndaj Hasanit në minutën e 94, përgjumi lojtarët e Xhafës. E befasia erdhi në fund kur Xhixha fiksoi shifrat në 1-1 në gabimin e vetëm të bërë nga Tirana në Selman Stërmasi. Pistoleri i Lacit nxjerr nga vetja edhe një serioz si Starova, që festoi në fushë, me shumë se për rezultatin, kundërshtarit kujt ia mori dhe për mënyrën si erdhi....
