Në prill të vitit 2016 premtoi transparencë absolute, kur erdhi në krye të Federatës gjermane të futbollit, ndërsa pothuaj tre vjet më pas Presidenti i DFB, Reinhard Grindel, ka dhënë dorëheqje nga posti pikërisht për shkak të akuzave për korrupsion. Numri 1 i futbollit gjerman është dorëzuar para presionit të madh, pas akuzave se nuk ka deklaruar në hyrje një orë luksoze, të dhuruar nga zëvendëspresident i UEFA-s, Grigoriy Surkis.
Gjithcka ka nisur me një dhuratë, në koston e 6 mijë euro, që biznesmeni ukrainas Grigoriy Surkis i ka bërë kreut të Federatës Gjermane. Surkis, në fakt është një njohje e vjetër edhe e Armando Dukës, kreut të Federatës Shqiptare të Futbollit dhe pikërisht në zgjedhjet e shkurtit 2018 mbërriti në Tiranë në mbështetje të presidentit aktual, për të mbajtur larg politikën nga futbolli. Kushedi nëse i është bërë edhe presidentit të FSHF-së një dhuratë e tillë, e nëse cështja do të kishte të njëjtën pasojë edhe në futbollin tonë.
Grindel ka kërkuar falje publike për pranimin e kësaj dhurate, duke tentuar të shpjegojë se e gjithë siatuata nuk ka lidhje me korrupsionin: “Të gjithë ata që më njohim mua e dinë se unë nuk jam lakmitar - tha Grindel në një komunikatë të publikuar nga federata gjermane -. Surkis nuk kishte asnjë interes financiar në DFB. Ai kurrë nuk më ka kërkuar përkrahje, as para e as pas kësaj dhurate. Nuk ka pasur dhe nuk ka konflikt interesi për mua”, thuhet më tej në komunikatë.
Grindel bëhet kështu presidenti më jetëshkurtër i federatës gjermane në historinë e saj 114-vjeçare, ndërsa drejtimin e federatës deri në shtator do ta marrin zëvendëspresidentët Rainer Koch dhe Reinhard Rauball.
