Ëndërra për të fituar dy trofetë sezonalë është mbyllur në Gjirokastër për Partizanin, që ka dalë i mundur edhe një herë nga qyteti i gurtë, i mundur 1-0 në ndeshjen e kthimit të cerekfinaleve të Kupës së Shqipërisë. Dëmtimet e shumta e kishin lënë pa shumë zgjedhje Skënder Gegën, që për më tepër duhej edhe të rikuperonte 1-2 e disfatës së ndeshjes së parë kundër Luftëtarit. "Nuk mund ta shohësh të ardhmen e dikujt, në qoftë se nuk e provon - shpjegoi Gega ndryshimet e katër lojtarëve në dy pozicionet e qendrës së mesfushës -. Nganjëherë e bën këtë lloj eksperimenti, bashkohet me rezultatin dhe duket si e suksesshme. Unë shikoj detajet. Lojtarët e tjerë nuk kanë agresivitetin e Telushit dhe Hila".
Pas triumfit në sfidën e parë, bluezinjtë e Ahmataj arritën një tjetër sukses me 11 metërshin e Dungës, që ruan traditën e më shumë se dy dekadave pa humbje përballë të kuqve në ndeshjet e zhvilluara në Gjirokastër. "Kur kam ardhur këtu - kujtoi tekniku Ahmataj -, Kupa nuk ka qenë farë në horizont. Objektivi është qëndrimi në kategori, por mendoj që duhet të rishikohet kalendari i ngjeshur. Është një torturë të luash 5 ndeshje në 2 javë".
Pas 37 vjetësh Luftëtari e sheh veten në gjysmëfinalen e Kupës së Shqipërisë, ndërsa për të ruajtur pathyeshmërinë e fushës përballë të kuqve, duhet të provojë edhe një herë në kampionat të dielën, kur dy skuadrat të vendosen sërisht përballë, por me objektivat të ndryshme.
