Në Niko Dovana Tirana kthehet tek fitorja dhe qetësia, në një javë ku rezultatet shkuan në favor të tyre: 1-3 përballë Teutës, që është në krizë të plotë dhe me shumë mundësi i ka thënë lamtumirë ambicjes për të qenë në Europë. Në fund të fundit nuk mund të arrish objektivin me statistikat e durrsakëve: në 5 javët e fundit katër humbje dhe një fitore, me 14 gola të pësuar dhe vetëm tre të shënuar. E paradoksi është se këto i ka pësuar ajo që në 2018 ishte mbrojtja më e mirë e kampionatit.
Ardian Mema e kishte menduar se kjo ndeshje mund të ishte decizive dhe e tillë rezultoi. Ndryshimet drastike të bardhebluve, ishin më shumë se funksionale, ndoshta sepse kishte nevojë për më shumë motivim skuadra, apo se në këtë mënyrë Mema e gjeti Shëkmbin krejt të papërgatitur. Ashtu si në fakt, në një ndeshje pasive deri në atë moment, tre minuta nga fundi i pjesës së parë, Oduamadi finalizoi një kundërsulm të shpejtë.
Vajushi, shumë larg pritshmërive të blerjes së bujshme të janarit, nuk arriti ti japë impulsin që kërkonte Shkëmbi në pjesën e dytë, e në lojën e preferuar të bardhebluve, prapavija e cekuilibruar e Teutës ishte preja e duhur. Hasani shënoi golin e dytë, që do të ishte mjaftueshëm për të kontrolluar lojën, edhe nëse përpjekjet sporadike të bregdetarëve do të kishin sukses.
E në fakt, vetëm dy minuta pasi u fut në fushë, Kamara ktheu shpresat për Teutën në të 72, përpara se Karabeci të stabilizonte distancën e sigurisë me 1-3, që projekton Teutën (43) 4 pikë larg Europës, ndërsa Tiranën (36) 6 pikë larg rrezikut krutan.
