Laci nuk ka hequr dorë nga Europa dhe e bën të qartë me fitoren 1-0 përballë Skënderbeut, duke i parakaluar madje në renditje. Vendosi Shtubina, por nëse skuadra e Starovës ka dalë me tre pikë nga fusha merita është e gjitha e Gentian Selmanit, që i vetëm ndali cdo tentativë të korcarëve, madje edhe Bregun nga 11 metra. Kurbinasit vinin nga humbja dhe kishin përballë një skuadër me moral të lartë, pas suksesit me Kastriotin dhe zërave për një situatë premtuese në CAS.
E në fakt, bardhekuqtë e vunë në provë të vështirë kundërshtarin, me daljet e shpejta të Bregut e Gripshi, por që fillimisht e patën të vështirë të inkuadronin portën kundërshtare. Ritëm i lartë dhe përmbysje frontesh në situate kundërsulmesh, por golin do ta gjejnë bardhezinjtë. Oktopu nuk pati qetësinë të bëjë pasimin e duhur tek Xhixha, por sulmuesi bën veprimin e duhur në të 30 kur me kokë shërbeu për Shtubinën, që vendosi avantazhin në një përgjumje totale të Skënderbeut. Reagimi i korcarëve është i fortë, por fati i keq i tyre është se gjetën përballë një Selmani monumental.
Kapiteni i bardhezinjve ndaloi cdo tentativë të drejtuar portës, nga silura e Ditës deri tek goditja e dënimit e Radas, ndërsa porta kurbinase duket e mallkuar për Skënderbeun që në fund të pjesës së parë ka vetëm iluzionin e golit, në tentativën e Bregut. Starova bën atë që di të bëjë më mirë, të mbrohet, por shumë inisiativë në këmbët e bardhekuqve rrezikon ti komplikojë fitoren…nëse nuk do të ishte për Selmanin. Portieri fantastic në të 47 ndaj Krasniqit mbajti në lojë gjatë gjithë kohës një skuadër që u duk në vështirësi përballë furisë korcare. E rezistenca e portierit u duk se do të ndalej në të 52, kur Sefgjini shkaktoi 11 metërsh me ndërhyrjen ndaj Kristi Vangjeli. Por llogaritë ishin bërë pa Selmanin, që hipnotizoi edhe Bregun, duke pritur penalltinë e duke i dhënë një goditje psikologjike korcarëve, që u ndje në minutat në vazhdim.
E pavend në fakt dhe e vetmja notë negative për kurbinasit shishja e hedhur mbi Vangjelin, që ndërpreu takimin për disa minuta. Skënderbeu tentoi deri në fund të ndryshonte fatet e kësaj ndeshje, por me Selmanin në këtë gjendje nuk ia doli dot: portiere bëri të njëjtën figurë edhe në goditjen e Sambou, duke i dhënë tre pikë të tijve që e cojnë në kuotën 44, duke vënë nën presion Teutën, Flamurtarin e Kukësin.
