Një tjetër mbrojtës krahu mund të vishet zikaltër. Sipas "Sky Sport", Danilo i ka thënë "po" Inter, në negociatat që po zhvillohen prej disa javësh. Interesi i klubit zikaltër, për hir të të vërtetës, ka nisur që në vjeshtën e kaluar.
Tani Inter po diskuton me Manchester City, që gjithsesi nuk mendon të kundërshtojë shitjen e lojtarit, prej kohësh jashtë preferencave të Guardiola. Oferta e parë e zikaltërve është 15 milionë euro dhe klubi anglez ka kërkuar kohë përpara se të vendosë.
Nga ana e tij, Danilo është i gatshëm të heq dorë nga një pjesë e pagës. Kështu nga 4.5 milionë euro që merr aktualisht, mund të pranojë 3.5 për një kontratë më të gjatë, prej të paktën 4 vjetësh.
Këtë sezon ish-mbrojtësi i Porto ka zbritur në hierarkinë e Pep Guardiola: edhe për shkak të një dëmtimi në kavilje, Danilo ka luajtur vetëm 21 ndeshje sezonale me Manchester City. Në të djathtën e skuadrës së qytetarëve preferohet gjithmonë Walker, ndërsa në të majtë nuk arrin të fitojë ndaj konkurrencës së Mendy, Zinchenko dhe Delph.
