Telashe për Turqinë, por po aq probleme edhe për Romën, që ka tashmë një tjetër lojtar të shtuar në infermeri. Pas Perotti, Spinazzola e Zappacosta ndalet edhe talenti Cengiz Under. Sulmuesi verdhekuq, i impenjuar me Turqinë, është ndalur gjatë seancës së fundit stërvitore. Dëmtim muskular në bicepsin femoral të kofshës së djathtë, është përgjigjia e mjekëve. Under do të kthehet në Trigoria të premten në 6 shtator, ditë kur do të vlerësohet me saktësi edhe shkalla e dëmtimit dhe kohët e rikuperimit.
Cengiz Under, në grumbullim me kombëtaren turke për të përgatitur ndeshjet kualifikuese kundër Andorra e Moldavisë, në Grupin H, e vlefshme për kualifikueset e Euro 2020, është dëmtuar në stërvitjen e fundit. Fantazisti, një nga pikat e forta të Turqisë, është jashtë dy ndeshjeve që mund të jenë shumë të rëndësishme për Turqinë, që ndiqet nga Islanda dhe Shqipëria. Formacioni i Senol Gunes ka marrë një goditje me këtë dëmtim, pikërisht para dy ndeshjeve ku turqit nuk duhet të gabojnë, për më tepër që sfida direkte në Elbasan Arena mes Shqipërisë dhe Islandës në 10 shtator mund ti kompromentojë keq.
Natyrisht Islanda e Shqipëria duhet më parë të fitojnë vetë ndeshjet e tyre, para se të shohin cdo të ndodhë me kundërshtarët, por mungesa e një lojtari fondamental për Gunes është një asist që mund ti favorizojë në rikuperimin ndaj Turqisë, sidomos kuqezinjtë që, në ndeshjen debutuese, atëherë kur në pankinë ishte Panucci dhe Reja e ndiqte nga tribuna, janë mundur në Loro Borici.
