Shifrat nuk janë optimiste, performancat në kampionat gjithashtu, por fitorja në ndeshjen e parë të Kupës së Shqipërisë kundër Vorës 0-3 ka sjellë entuziazëm në kampin e Partizanit. Nuk është fitorja kundër një skuadre modeste, sa është impenjimi që treguan lojtarët dhe sinjalet që mori italiani nga këto 90 minuta. Një rezultat në kohën e duhur, pikërisht atëherë, kur në kryeqytet mbërrin Bylis, formacion fitues prej tre ndeshjesh radhazi. Mund të mos jetë përballje e lehtë, por për Partizanin e Lerdën konsiderohet pika e kthesës.
“E rëndësishme është që skuadra përgjigjet, më vjen mirë që Solomon gjeti golin. Një sinjal i mirë para ndeshjes – e konsideroi Lerda, që ka theksuar se “Do të mundohemi të bëjmë kthesën pikërisht nga sfida me Bylis. Nuk e njoh si skuadër, por do marrim informacionet e duhura e do të jemi gati të nisim një tjetër histori nga e shtuna”.
Partizani në 8 ndeshjet sezonale, nga të cilat katër në Europë, regjistron 4 humbje dy barazime e vetëm dy fitore, tre nëse llogarisim edhe kupën. Nuk janë shifrat e një skuadre kampione në fuqi, por ndoshta është koha, ashtu si theksoi Lerda të ndryshohet kurs, duke filluar nga sfida me Bylis.
