Që PSG do të ishte skuadra për tu mundur në Francë kjo dihej, ashtu sikurse dihej që kryeqytetasit janë edhe skuadra më kualitative në Ligue 1, por 8 pikë distancë në vendi i dytë në vetëm 11 javë janë shumë, në pak kohë. Skuadra e Tuchel ka përfituar nga humbja e Nantes së vendit të dytë, për të rritur diferencën, me pokerin e shënuar në portën e Marseille.
Në ‘Parc des Princes’, rezultatin 4-0 e ndanë mes tyre Mbappe e Icardi me nga dy gola secili. Në vetëm 26 minuta lojë, argjentinasi kishte shënuar dy herë në portën e Mandandës, fillimisht duke hapur serinë e golave në të 10 e më pas duke shfrytëzuar asistin e Verratti.
Për të mos u sforcuar edhe në pjesën e dytë PSG i mbylli llogaritë që në 45 minutat e para me dy gola të Kylian Mbappe, me dy assit të Di Maria. Francezi konfirmohet një finalizues i frikshëm, por Tuchel i gëzohet edhe formës së Di Marias, i jashtëzakonshëm gjatë muajit tetor. 27 pikë për PSG, që ndiqet tetë pikë distancë nga Nantes. Dështon të ngjitet në vendin e dytë Marseille, që javën e ardhshme duhet të sfidojë Lille të vendit të tretë me 18 pikë, ndërsa parisienët kanë një shëtitje në transfertën e vendit të fundit në Ligue 1, Dijon.
