Nëse nuk fiton në Vlorë kundër këtij Flamurtari rezultati është zhgënjyes. Këtë e ka të qartë edhe Skënderbeu që në transfertën me kuqezinjtë nuk shkoi më shumë se një barazim 1-1, që nuk mund të kënaqë Ilir Dajën, teknikun e bardhekuqve, i rikthyer në Vlorë si kundërshtar pas sezonit që drejtoi Flamutarin. Për teknikun më shumë se rezultati i marrë kundër ish-skuadrës së tij problem është trajtimi që i rezervohet korcarëve nga arbitrat: "Më bën përshtypje se në disfavorin tonë ka gola të mohuar, e penallti të padhëna - u shpreh Daja në përfundim të ndeshjes -. Kjo pjesë po bëhet si vazhdë. Skënderbeu është po ai Skënderbe që ka qenë, dhe dalim në fushë të respektojmë kampionatin".
Skënderbeun e kaloi në avantazh një vlonjat: Dejvi Bregu shënoi në minutën e 23, por nuk festoi në respekt të ish-skuadrës së tij. Lëvizja në pankinë, edhe pse Flamurtari nuk ka ende një trajner të ri, i dha motivim lojtarëve, që gjetën barazimin në pjesën e parë me golin e Sukajt katër minuta para pushimit, duke fiksuar një 1-1 që mbeti në fuqi deri në fund.
Skënderbeu ngjitet në kuotën e 14 pikëve dhe e lë Lacin sërisht pas në klasifikim, ndërsa ky është barazimi i tretë në 10 javë për Flamurtarin, që nuk e ka provuar ende shijen e fitores këtë sezon.
