Pritshmëritë i kishin të madhe, por në sallën sportive Feti Borova Partizani në volejboll për femra nuk arrin të përmbushë misionin për tu kualifikuar në fazën e grupeve të Champions League. Në një përballje të komplikuar nga fitorja e Vasas Obuda Budapest në Hungari 3-0, kryeqytetaset janë dorëzuar edhe në shtëpi me të njëjtin rezultat, duke i dhënë fund kështu edhe aventurës së teknikut Nexhat Sanxhak në krye të skuadrës.
Tekniku turk, gjithashtu trajner i Kombëtares së Kazakistanit, ka përfunduar kontratën me Partizanit, që ishte konkretisht deri në mbyllje të aventurës në Champions. Një lëvizje që natyrisht nuk duhet të ketë gjetur të papërgatitur presidentin e të kuqve Rogert Huqi, që është gati të bëjë revolucionin në skuadër, duke qenë se edhe Hudecova dhe Basa janë shitur tashmë në skuadra të tjera, sipas asaj që ka bërë të ditur vetë numri 1 i klubit.
Prezenca e skuadrës së futbollit e Partizanit, me në krye Franco Lerda, nuk ka ndihmuar vajzat të arrijnë suksesin. Hungarezet e Vasas Obuda Budapest kanë patur impaktin më të mirë me ndeshjen, të forta edhe nga morali i krijuar një javë më parë. Por nëse në transfertë Sanxhak u la në baltë nga gjendja emocionale e Hudecovas dhe forma jo e mirë e Manss, këtë herë Partizani u tregua inferior në lojën në bllok, duke treguar mungesën e bindjes se mund tia dilte. Seti i parë u fitua nga hungarezet me shifrat 19-25, ndërkohë që seti i dytë që vendosi edhe kualifikimin për Vasas përfundoi me rezultatin 17-25. Më pas u luajt vetëm për statistikë dhe hungarezet fituan edhe setin e tretë 16-25, duke shkuar me meritë në grupin D të Champions.
