Stadiumi Air Albania do të ngre siparin zyrtar tashmë për ndeshjen e fundit kualifikuesedrejt Euro 2020, pikërisht kundër kampionëve të botës të Francës. Skena e duhur për ndeshjen e duhur, por përpara se skuadrat të japin spektaklin e tyre në fushë, Era Istrefi dhe këngëtarë të tjerë do të përformojnë për kënaqsinë e 21.700 tifozëve të pranishëm në stadium, sepse sipas asaj që bën të ditur FSHF janë shitur të gjithë biletat.
Në fakt, është programuar të zhvillohet një spektakël për rreth 30 minuta. Sipas asaj që bëhet e ditur Era Istrefi, artistja që këndoi himnin zyrtar të Rusi 2018, do të jetë pjesë e festës me 3 këngë, ashtu si edhe Flori Mumajesi. Himni kombëtar shqiptar do ti besohet Juluana Pashës, ndërsa Marsejezën do ta këndojë Besa Kokëdhima.
Rregullat që duhet të dinë tifozët për nesër:
1. Do kontrollohet karta e identitetit dhe bileta. Gjithashtu do të ketë kontroll fizik të tifozëve;
2. Nuk lejohen të futen në stadium tifozë me jelekë të paloguar;
3. Nuk do të lejohen tifozët që mbajnë çanta shpine, çadra, çakmakë, aparate fotografikë apo kamera, e gjithashtu fara luledielli.
4. Uji dhe pijet e tjera nuk do të lejohen të futen nga jashtë stadiumit, pasi tifozët kanë mundësinë t’i blejnë në tribunat përkatëse, ku do të ketë shërbim katering.
5. Mjete piroteknike si flakadanë, fishekzjarrë, kapsolla apo tymuese janë rreptësisht të ndaluara.
6. Tifozëve u ndalohen edhe vuvuzelat, boritë, bilbilat dhe lazerat.
7. Flamujt dhe simbole të tjera kombëtare do të lejohen vetëm me shkopinj plastikë.
8. Janë rreptësisht të ndaluara banderolat me përmbajtje politike.
