Dhuna e ushtruar nga arbitrit të basketbollit Muho, në fund të ndeshjes mes Teutës e Tiranës do të ketë pasoja të rënda për Bruno Daliun, basketbollistin e bardhebluve, që nxorri KO Muhon, duke e goditur me grushte, deri sa e rrëzoi përtokë. Federata Shqiptare e Basketbollit ka paralajmëruar, përmes një komunikate për shtyp, se do të vendosë të hënën mbi ngjarjen, por tonet e përmendura në komunikatën e Federatës tregojnë qartë pozicionimin që ka ndërmend të marrë institucioni që drejton basketbollin.
REAGIMI I FSHB
Federata Shqiptare e Basketbollit dënon ashpër ngjarjen e shëmtuar të ndodhur të shtunën në mbrëmje në Pallatin e Sportit “Ramazan Njala”, në takimin midis Teutës dhe Tiranës, e vlefshme për javën e 7-të të Superligës së Kampionatit Kombëtar të Basketbollit për Meshkuj.
Dhuna barbare e ushtruar nga njëri prej lojtarëve të Tiranës kundrejt njërit prej gjyqtarëve të takimit është krejtësisht e pa përligjur, e pa papranueshme dhe thellësisht e dënueshme. Skena të tilla, që për më tepër u përcollën drejtpërdrejt në ekranet e shqiptarëve nuk janë asgjë të përbashkët me basketbollin dhe bien ndesh me të gjitha vlerat që përçon sporti.
Federata Shqiptare e Basketbollit i uron gjyqtarit Muho shërim sa më të shpejtë, ndërsa mbështet plotësisht veprimet e Policisë dhe autoriteteve të ligjit, në përputhje me legjislacionin përkatës. Federata Shqiptare e Basketbollit njofton opinionin publik se teksa po administrohet protokolli i ndeshjes dhe dëshmitë e ngjarjes, si dhe pamjet filmike ditën e hënë do të mblidhet Komisioni i Disiplinës në FSHB për të shqyrtuar dhe për vendosur mbi këtë ngjarje.
Federata Shqiptare e Basketbollit
