Tirana ka dalë e mundur në Selman Stërmasi 1-3 përballë Kukësit, që është imponuar me përmbysje kundër bardhebluve, që tani duket larg nga kohët kur mendonin se mund të pretendonin për titullin kampion. Dorëheqja e Ahmatajt, akuzat e lëshuara pas humbjes në Korçë, duket se ka lënë gjurmë edhe pse tekniku ktheu mendje, por tani duket se situata është më dramatike dhe përmes fjalëve të post-ndeshjes lexohet një skuadër të cilën elbasanasi nuk e ka më nën kontroll: "Po ta shikoni lojën, tërheqje pafund mbrapa, ndërkohë që detyrat ishin para - pranoi Ahmataj -. Vajtja me vonesë në presing, sjell atë që kundërshtari të shfaqet me fytyrë nga porta dhe të jetë e vështirë dalja përpara. Duhet kohë që t’i bindësh lojtarët".
Por kohë nuk ka. Tirana tani është gjashtë pikë larg vendit të parë dhe javën e ardhshme vjen përplasja direkte në derbi. Avantazhi provizor i Hasanit, krijoi iluzionin se bardheblutë do të ishin gati të rikuperonin pikë të rëndësishme e ti ktheheshin objektivave, por pjesa e dytë ka qenë drastike. Shkurtaj me 11 metërsh e pastaj Gavazaj e Abazaj kanë firmosur përmbysjen, edhe pse Ahmataj mundohet të kapet pas një episodi atë të penalltisë: "Një lojtar me aq shumë eksperiencë nuk mund të jetë aq i nxituar. Nuk mund ti jap dot shpjegim gabimeve që ndodhin brenda. Duhet të jenë më të qetë, nuk ishte rast flagrant. Ne kishim gjithë skuadrën të kthyer në ato momente".
