Një javë nën shenjën e derbit të kryeqytetit, e kjo sepse për të dy kryeqytetaset është domethënëse e mund tiu kondicionojë jo pak të ardhmen. Luhet të premten, sfida që hap javën e 15 të Superiores, e ajo që do të bëjë të flasë më shumë se të tjerat. E kanë të qartë të gjithë, që nga tifozët, që janë të parët që sfidohen në derbin e tribunave: e kanë bërë gjithnjë, por këtë herë është si të jetë e para. E para, sepse luhet në Air Albania, në një impiant modern që do ti japë mundësinë spektaklit të organizuar të tifozërive, të jetë edhe më impresionues.
Guerrils e Fanatics apo kushdo qoftë nga grupimet, shpalosin fantazinë, euforike, ironike apo cinike, më mirë se cdo herë në derbi. Këtë herë përgatitjet kanë qenë më të kujdesshme, pikërisht sepse stadium i ri të jep mundësinë e një derbi në nivelet e atyre më të famshëm të Europës, duke folur për imazhin e performancës së tifozëve. Janë përcaktuar rrugët nga do të mbërrihet në stadium, janë vendosur oraret e grumbullimit, janë përzgjedhur skenografitë, madje kanë nisur edhe polemikat për pozicionimin në sektorët e tribunave.
Partizani, me kërkesë të bërë zyrtarisht, kishte vendosur të ndryshojë akomodimin e tifozëve në sektorët e stadiumit, në krahasim me kohën kur ndeshjet luheshin në Qemal Stafa: kështu, tifozët e Tiranës, që qëndronin pas porte në tribunën nga krahu i qytetit, tashmë duhet të qëndrojnë në anën tjetër, gjë që nuk i ka pëlqyer fare Tiranës dhe tifozëve bardheblu, që duan të qendrojnë si përherë në tribunën që mban edhe emrin e legjendës së tyre Fatmir Frashëri. Janë vetëm shkëndijat e para, nga të shumtat që do të përjetohen në 90 minutat e të premtes, në një ndërqytetase që do të futet në histori, cilido qoftë rezultati.
