Pesë pikë në tre ndeshje, më saktë një fitore e dy barazime, ka premtuar tekniku i Famurtarit Luan Birce dhe me 2-2 befasues kundër Bylis në Vlorë është krejtësisht brenda synimit. Nga 5 golat e fazës së parë në këtë barazim me kuqezinjtë gjërat kanë ndryshuar e shumë, por Dovedan ndoshta këtë herë kishte edhe peshën e 6 mungesave të rënda, që e kishin boshatisur formacionin e Bylis dhe kishin mbushur pankinën me lojtarë të moshave. E megjithatë, vendi i parë nuk u arrit dhe kjo duhet ta bëjë teknikun e mallakastriotëve të reflektojë.
Sukaj, në krye të sulmit në mungesë të Ribajt, mori masat e portës në pozicion jashtë loje, në të 8, por në të 19 e kishte seriozisht kur në asist të Hoxhajt mposhti rezistencën e Hidit me një goditje fine me kokë. 1-0 për Flamurtarin solli reagimin e ballshiotëve, që fituan terren gradualisht. Barazimi ishte në ajër dhe përpara se të shkonin skuadrat në dhomat e zhveshjes Guindo barazoi rezultatin, duke i kujtuar vlonjatëve rikuperimet e shumta që kishin marrë në këtë sezon.
Sulmuesi nuk ishte dakord edhe me barazimin dhe tërhoqi Bylis përpara. Mocka duhet të ndërhyjë 7 minuta më pas për të ndaluar lojtarin të shënonte dygolëshin personal, por takimin me golin ia vonon vetëm një minutë sepse në krosimin e Peposhit, mes pesë fanellash kuqezi, Guindo ishte i pambuluar dhe për Hidin e pamundur ta ndalte.
Përmbysje e arritur por vetëkënaqësia është vrasëse. E befasia erdhi tre minuta nga fundi, kur Nebihu barazoi rezultatin, duke i shtuar një pikë më shumë Flamurtarit në renditje: ndoshta nuk ka shumë vlerë në këtë moment për Bircen, por për Dovedan po: nuk e kishte menduar se kreun do tia mohonte një skuadër e mbytur...
