Drejtori Sportiv i Cagliari është bërë i njohur se mori tek Empoli, teknikun aktual të Juventus, Maurizio Sarri. Por në konferencë për shtyp përpara sfidës me bardhezinjtë, Marcello Carli i është kthyer të shkuarës. Drejtori i ishullorëve i është përgjigjur ngacmimit mbi meritën që kishte për marrjen e Sarrit tek Empoli, me fjalët që ngjajnë më shumë me shpërfillje.
“Asnjë meritë e imja, ishte punë fati. Maurizio erdhi tek Empoli në një moment të vështirë për skuadrën toskane - tha Carli -. Gjëja interesante që tregojmë shpesh unë e ai është se ishim të dy në një situatë dramatike, ishim dy të dëshpëruar. Pas 20 ditësh e kuptova se kisha rastisur në një trajner të nivelit të lartë e jam i lumtur që tani është trajner i Juventus. Në kohët e Empolit, paratë ishin pak e ai nuk kushtonte shumë kështu që zgjodha për trajner atë që kushtonte më pak, kjo po që ishte zgjedhje me fat”.
