Një shfaqje e vërtetë. Atalanta i shkakton Torinos humbjen më të rëndë në histori dhe arrin Romën në vendin e katërt të klasifikimit. Një mbrëmj për tu harruar për të besuarit e Mazzarri, që pësojnë shtatë gola dhe e mbyllin me nëntë lojtarë. Atalanta nisi menjëherë me marsh të lartë, Sirigu bëri gjithcka për të mbajtur në lojë granata, por pastaj kapitulloi në seri.
Në fillim Ilicic me asist të Palomino, pas një gabimi skandaloz të Laxalt (17'), më pas Gosens fluturimthi (29') e Zapata me penallti (faull i panevojshëm i Lukic ndaj Ilicic në të 46') ekzaltojnë skuadrën e Gasperini përpara se të zbrisnin në dhomat e zhveshjes. Në pjesën e dytë Torino të paktën e provoi: Lukic shkoi pranë golit, ndërsa Gollini vihet në provë në diagonalen e Belotti. Shpresat skuadrës së Mazzarri, në fakt, ia shuajti Ilicic: slloveni përfiton nga një pakujdesi e Djidji, që pasi shkaktoi faull me dorë e la topin në dispozicion të kundërshtarit. Fantastik Ilicic në goditjen nga rreth 50 metra, duke kapur Sirigu jashtë portës. Slloveni shënoi tregolëshin personal, në një sugjerim të Gomez, i vetëm përballë portierit.
Mbrëmja e Torinos bëhet edhe më e zezë kur 15 minuta nga fundi, Izzo ndëshkohet me kartonin e dytë të verdhë. Me 10 lojtarë, humbja merr përmasa historike: Meité pengoi Toloi e Muriel transformoi nga pika e bardhë për golin e gjashtë, ndërsa një minutë më pas kolumbiani merr një asist të Gomez për ta bërë 7-0. Përpara fërshëllimës finale, Lukic ndëshkohet me karton të kuq, duke e lënë Torinon me 9 lojtarë. Më keq se kaq...
