Mjafton një episod në fundin e takimit për të kthyer mërinë e ballshiotëve kundër vendimeve arbitrare, që në javët e para të 2020 kanë qenë gjithnjë penalizuese për Bylis. Nuk ishte ky rast në fakt, edhe pse protestat e mallkastriotëve pas penalltisë së akorduar nga arbitri Orlando Kuka në minutën e 90, vendim që më pas e anulloi pas konsultës me asistentin, kanë qenë të kota, pasi topi është përplasur në shpinën e mbrojtësit të Vllaznisë Ramadani dhe jo në krah.
Në fund 2-2 në një ndeshje dramatike, që u kuptua që në minutat e para se do të prodhonte spektakël. Bylis e Vllaznia praktikisht e nisë ndeshjen 1-1, sepse në tre minutat e para të ndeshjes në Adush Muca rrjetat u tundën dy herë. Malota ndëshkoi i pari Hidin në minutën e dytë, ndërsa kapiteni Murataj barazoi 60 sekonda më vonë, duke kthyer enuziazmin, që i bëri ballshiotët të përmbysin shifrat në minutën e 7. Ndreca vazhdon të jetë protagonist me Bylis, duke ndëshkuar Sherrin në mundësinë e parë të paraqitur për mesfushorin.
Tre gola në shtatë minutat e para, por skuadrat kanë përsëri për të thënë në një ndeshje, ku ishte e qartë se nuk duhej humbur. E megjithatë në pjesën e parë ka ende spektakël. Gilman Lika barazoi përsëri rezultatin tre minuta përpara se skuadrat të zbrisnin në dhomat e zhveshjes.
Ritëm e grintë në fushë edhe në pjesën e dytë, por asnjë nga skuadrat nuk tregohet dot superiore, me Hidin e Sherrin në lartësinë e duhur. 31 pikë për Bylis, që në këtë fillim viti mbetet pa fitore dhe sheh kreun ti shkëputet 7 pikë larg. Vllaznia dështon ndërkohë ti bashkohet grupit të skuadrave që synojnë zonën Europiane, por një pikë në Ballsh është gjithnjë pozitive.
