Arbitrat në fushë, Komisioni i Disiplinës jashtë saj. Bylis vazhdon të marrë goditje të njëpasnjëshme, edhe pse këtë herë stuhia e polemikave nuk u ngrit nga një vendim i gabuar, por nga dy standardet e përdorura nga arbitrat dhe njerëzit që vendosin drejtësinë. Tirana shënoi me dorë, kundër Teutës nuk i dhanë penallti, në Ballsh bëhet VAR pa patur sistem, duke nervozuar një qytet të tërë në minutën e 90 të sfidës me Vllazninë. E sikur të mos mjaftojë Disiplina fillimisht i dënon dy javë trajnerin Dovedan, ndërsa tani 8 javë mbrojtësin Jurgen Goxhaj.
Komisioni i Disiplinës vendosi në mbledhjen e sotme të pezullojë me 8 ndeshje futbollistin e Bylisit Jurgen Goxhën për sjellje anti-sportive kundër arbitrit Orlando Kuka. Lojtari tentoi t’i jepte fanellën e tij arbitrit në shenjë proteste për akordimin fillimisht të një penalltia në kohën shtesë e më pas anullimin e saj. Nuk shpëton nga Disiplina edhe presidenti i klubit Besnik Kapllanaj: 2 ndeshje skualifikim për gjuhë anti-sportive të përdorur pas takimit Bylis-Vllaznia 2-2, kur akuzoi delegatin e takimit Bujar Pregja se anulloi penalltinë e ballshiotëve me telefon. Nuk mund të mungonte gjoba financiare: 50 mijë lekë për sjellje të gabuar të tifozëve në stadiumin “Adush Muça”
Vendimi i Komisionit të Disiplinës së FSHF
KF Tirana për sjellje te gabuar te spektatoreve në bazë të nenit 65/4/a të KDS dënohet me gjobe ne masën 100.000 (njëqindmijë) Leke.
KF Tirana detyrohet të dëmshpërbleje dëmtimet e shkaktuara brenda 15-ditesh në stadiumin “AIR Albania” nga spektatoret përkatës sipas akt konstatimit të personave përgjegjës ne stadium.
KF Bylis per sjellje te gabuar te spektatoreve ne baze te Nenit 65/3/c dhe 65/4/a te KDS dënohet me gjobe ne masën 50.000 (pesëdhjetëmijë) Lekë.
Zyrtari i KF Bylis Besnik Kapllanaj sjellje ofenduese dhe jo-Fair Play ndaj vendimeve të zyrtarëve të ndeshjes, në bazë të nenit 55/1) të KDS dënohet me 2 ndeshje pezullim nga aktiviteti. Në bazë të nenit 19 të KDS, zyrtarit i ndalohet qëndrimi në dhomat e zhveshjes, stolin e rezervave dhe ambientin përreth fushës.
Lojtari i KF Bylis Jurgen Goxhaj per sjellje te gabuar ndaj zyrtarit te ndeshjes ne baze te Nenit 48/4 te KDS, dënohet me 8 (tetë) ndeshje pezullim nga aktiviteti.
Zyrtari i KF Flamurtari Dritan Resuli në bazë të Nenit 12 të KDS, paralajmërohet se në rast përsëritje te shkeljes, do të jetë subjekt i masave disiplinore që parashikon Kodi i Disiplinës Sportive dhe rregulloret e tjera të FSHF.
KF Egnatia në bazë të Nenit 12 të KDS, paralajmërohet se në rast përsëritje te shkeljes, do të jetë subjekt i masave disiplinore që parashikon Kodi i Disiplinës Sportive dhe rregulloret e tjera të FSHF.
KF Devolli per sjellje te gabuar te spektatoreve ne baze te Nenit 65/3/c dhe 65/4/b te KDS dënohet me 4 (katër) ndeshje pa spektatore.
Lojtari i KF Turbina Hektor Mali per sjellje te keqe ndaj kundërshtarit ne baze te Nenit 47/1/d dënohet me 2 (dy) ndeshje pezullim nga aktiviteti futbollistik.
Pranimin e kërkesës së zyrtarit të Akademia AAS, Haris Lika, konvertimin e dënimit me gjobë për pjesën e mbetur të dënimit.
Rrezimin e Kërkesës së KF Klosi, si të pabazuar në Kodin e Disiplinës Sportive.
