Një ngjarje e shëmtuar për Jan Vertonghen e për familjen e tij. Në mbrëmjen e të martës, ndërsa 32 vjecari belg ishte i impenjuar në Leipzig në ndeshjen e kthimit të 1/8 të finaleve të Champions League me Tottenham, katër persona të armatosur me thika janë futur me forcë në shtëpinë e tij në veri të Londrës. Lajmin e ka bërë të ditur BBC. Hajdutët kanë kërcënuar me thikë gruan dhe fëmijët e mbrojtësit të Spurs.
Një zëdhënës i Tottenham ka deklaruar: “I kemi dhënë mbështetje Jan e familjes së tij në këtë periudhë tmerrësisht traumatike. Inkurajojmë këdo që mund të ketë informacion, të ndihmojë policinë me hetimet“.
Një zëdhënës i policisë, ndërkohë, ka deklaruar: “Policia është thirrur nga një adresë rezidenciale në NË3 në orën 19:29 të 10 marsit për të denoncuar një grabitje me dhunë. Punonjësit e policisë mbërritën në vend. Është mësuar se katër persona që mbanin maska në fytyrë, të aramatosur me thika, kanë hyrë me forcë në pronë e kanë grabitur disa objekte para se të largoheshin. Askush nuk mbeti i plagosur. Të dyshuarit ishin larguar përpara mbërritjes së policisë. Nuk ka patur arrestime deri tani dhe hetimet vazhdojnë“.
