Si pasojë e akteve vandale të muajve të kaluar, që kur Zlatan Ibrahimovic është bërë aksioner i Hammarby, statuja e dedikuar kampionit suedez të Milan e vendosur përpara stadiumit të Malmoe, në Suedi, shumë shpejt do të spostohet në një vend të ri. Mes hipotezave, sipas të përditshmes 'Sydsvenskan', është ajo e një transferimi në Stokholm, ku është selia e federatës suedeze të futbollit.
Statuja e Zlatan Ibrahimovic, që u vu me shumë krenari përpara stadiumit të Malmoe, skuadrës së tij të parë, tani është e padëshirueshme. Pasi i vunë qesen e plehrave, i thyen hundën, në natën mes 4 e 5 janarit 2020, vandalët i prenë këmbët statujës, duke e rrëzuar përtokë. Skulptori, Peter Linde, u shpreh në lidhje me këtë ngjarje për Sportbladet: "Jam i tronditur. Për të bërë një dëm të tillë duhet kohë. Me siguri dikush e ka parë skenën por nuk ka lëvizur as gishtin. Në këtë pikë, më mirë ta vendosin në Milano, aty tifozët e adhurojnë."
Këshilli komunal i qytetit të tretë më të madh në Suedi pret sugjerime nga skuadra vendase, për një vend të ri. Administratori i deleguar i Malmoe, Niclas Carlnen, ka pranuar në gazetë se nuk ishte në dijeni të planeve të qytetit e se nuk dëshiron të bëjë koment për cshtjen. Statuja e bronxtë e Ibra, e inauguruar tetorin e kaluar, është riparuar dhe ruhet në një vend sekret.
