Rifillimi i Bundesligës, me vetëm 3 fitore vendase, 7 barazime e 12 suksese të miqve në 22 ndeshje të luajtura deri tani, duket se sugjeron që dyert e mbyllura kanë zhdukur faktorin fushë. Një studim i Universitetit të Reading e të shkollës së menaxhimit në Dusseldorf Otto Beisheim, mbi efektet që mund të ketë turma në sjelljet e futbollistëve e të arbitrave, konfirmon se pa tifozë, kush luan në shtëpi, humbet më shumë se dicka.
Janë marrë në konsideratë ndeshjet me dyer të mbyllura të luajtur në kupat europiane e në ligat kryesore kontinentale nga 2002/03: janë 161 në total. Për sa i përket rezultatit në fushë, del se me publik në 46% të rasteve fiton skuadra e shtëpisë, pa publik të dhënat ulen në 36%... ai 10% më pak fitore të brendshme tranformohet në pjesën më të vogël në barazime (2%) e gati plotësisht në fitore të skuadrave jashtë shtëpisë, që kalojnë nga 26 në 34%... Të dhënat e golave të bërë, sugjerojnë se pa nxitjen e tifozëve të tyre, skuadrat e shtëpisë shënojnë më pak: nga 1,45 gola për ndeshje, mesatarja zbret në 1.23. Nuk është se influencohet shumë ndërkohë pozitivi i golave të miqve.
Pjesa e Bundesligës e luajtur deri tani rrit tendencën: 13,6 % fitore të brendshme, 31,8 % barazime e 54,6 % suksese në transfertë. Përsa i përket arbitrave, nëse nga njëra anë shifrat nuk sugjerojnë një influencë të madhe të faktorit ambjental në makro-vendime (penallti, kartona të kuq), nga ana tjetër ato thonë se kartonat e verdhë për miqtë kalojnë nga 2.28 për ndeshjet me tifozë, në 1.90 me dyer të mbyllura. Një rënie e dallueshme...
Kështu, priten ndeshje më të ekuilibruara. Përtej vlerave teknike, e tregojnë numrat: kush ka stadiumet më të nxehtë rrezikojnë të humbasin më shumë. E Borussia e djeshme ishte dëshmia.
