Nuk ka supriza në votim. Me 106 vota pro dhe 10 kundër parlamenti votoi sot ndryshimet kushtetuese, ndërsa 6 deputetë kanë munguar në seancë.
Me shumicë votash parlamenti miratoi sot marrëveshjen e arritur mes maxhorancës dhe opozitës parlamentare, për të ndryshuar nenin 64 dhe 68 të Kushtetutës së Republikës. Këto ndryshime kanë qenë në fokus të politikës shqiptare, diplomacisë së huaj në vend, mediave dhe opinionit publik dy muajt e fundit.
Por ndërsa reforma zgjedhore do të pikturohet nga një palë si sukses e nga tjetra si kapje pushteti, çfarë duhet të dimë për ndryshimet kushtetuese që do të ndryshojnë mënyrën si Shqipëria shkon në zgjedhje tashmë e tutje? Lapsi.al zbërthen pozicionimin e palëve dhe shpjegon përplasjen si më poshtë.
Rama eci me përkrahjen e opozitës parlamentare dhe shkeljen e syut të Yuri Kim drejt votimit të këtyre ndryshimeve. Në esencë, debati mazhorancë-opozitë konsistonte në faktin që opozita kërkon që partitë të vazhdojnë të futen në zgjedhje me lista të veçanta kandidatësh. Pra PD me listën e saj, LSI me të sajën, etj, sikurse ka funksionuar më parë. Rama i hoqi këtë kartë opozitës me votimin e sotëm. Tashmë është e pamundur që opozita të futet e bashkuar në garë. PD dhe LSI, nëse duan të garojnë si një formacion i përbashkët në zgjedhjet e ardhshme, kandidatët e tyre jo vetëm duhet të bëhen bashkë në një listë zgjedhore, por për t’u regjistruar duhet të garojnë në logon e vetëm një partie, ose të PD, ose të LSI, ose në një logo të re. Këto alternativa refuzohen nga partitë e opozitës.
Pjesa tjetër e debatit konsistonte në hapjen e listave. Ndërsa pas disa ditësh paqartësi opozita u pozicionua në kërkesën e saj për 100% hapje të listave të kandidatëve, Rama dhe mazhoranca nuk u dakordësuan. Ata realizuan hapjen e 2/3 e poshtme të listës, ndërsa pjesa fituese 1/3 zgjidhet sërish nga partitë në garë. Në këtë mënyrë, kryetarët e partive kanë drejtpërdrejt dorë mbi zgjedhjen e deputetëve potencialisht fitues të mandatit. Opozita kundërshtoi ashpër këtë qasje duke thënë se për qarqet me pak deputetë, si përshembull 5, fituesit janë domosdoshmërisht persona që zgjidhen nga partia dhe jo nga populli, duke e zhvlerësuar komplet këtë nismë.
(Foto nga Këshilli Politik, tryze e ngritur me përfaqësues të mazhorancës, opozitës parlamentare dhe jo parlamentare për të diskutuar zhvillimin e Reformës Zgjedhore)
Në votimin e sotëm, kundër maxhorancës kanë dalë me votë deputetët, Adriatik Alimadhi, Fatjona Dhimitri, Gjetan Gjetani, Kujtim Gjuzi, Elda Hoti, Lefter Maliqi, Erjon Piciri, Artur Roshi, Zef Shtjefni, Suzana Topi.
Në listën e 6 deputetëve që mungojnë figurojnë emrat e deputetëve të prekur nga Covid-19 si Ralf Gjonaj, Elio Hysko, Enver Roshi, ku për të fundit Taulant Balla tha se është në gjendje të rëndë. Ndërsa që prej disa seancash, sikurse sot mungonin edhe Ligoraq Karamelo, Ambra Borova dhe Enada Kapllani. ©LAPSI.AL
