Ish-kryeministri Sali Berisha ka kërkuar ndjesë për akuzat e tij ndaj shefes së ONM, Genoveva Ruiz Calavera të cilën e kishte cilësuar si një bashkëpunëtore të kryeministrit Rama. Berisha thotë se komenti i tij ishte bërë në bazë të një lajmi të rremë.
“Statusi im bazohej në një fake news dhe unë besoj plotësisht te përgënjeshtrimi që bëri komisioneri Varhelyi që unë e vlerësoj si njeri serioz, transparent dhe një njeri që përpiqet të ndihmojë Shqipërinë me aq mundësi që ka. Nuk ka arsye të dyshoj në përgënjeshtrimin e tij. Tërheq me ndjesë statusin tim me bazë një fake news. Besoj që komentet e tjera janë të tepërta”, - deklaroi Berisha në Ora News.
Pak ditë më parë Berisha iu referua një artikulli të publikuar nga 'New Europe' ku shkruhet se Calavera, si bashkëpunëtore e kryeministrit Edi Rama i ka kërkuar Komisionit të Venecias të mos shqyrtojë Kodin Zgjedhor, edhe pse kjo kërkesë nuk iu mor parasysh. Nisur nga kjo, ish-kryeministri duke e cilësuar "ndrikull", tha se ajo duhet të largohet nga detyra dhe se BE duhet të nisë hetimet për lidhjet e saj me kryeministrin Rama.
Pas këtyre deklaratave reagoi komisioneri për Zgjerimin, Olivér Várhelyi që shprehej se ka besim të plotë te Calavera dhe te ambasadori i Bashkimit Europian, Luigi Soreca dhe se akuzat e mbërritura ndaj tyre si të njëanshëm, janë krejtësisht të pavërteta. ©LAPSI.al
