Pak ditë më parë kur Rama njoftoi nisjen e vaksinimit antiCovid në Shqipëri, u prezantua edhe fushata e re nën logon “Shqipëria buzëqesh”. Simboli ishte një lule e verdhë brenda së cilës ishte vendosur edhe një nusepashkë. Edhe kësaj radhe kryeministri dëshmoi se në mos është një kopjac i pandreqshëm, nuk ndahet dot nga arkitekti i tij i preferuar, italiani Stefano Boeri, firmën e të cilit mbajnë edhe projekte të tjera kullash në qendër të Tiranës.
Logo e fushatës “Shqipëria Buzëqesh” është kopjuar nga një fushatë e ngjashme që po bën Italia në kuadër të vaksinimit antiCovid. Ndërsa Rama ka zgjedhur ngjyrën e verdhë të lules, Boeri për Italinë ka propozuar ngjyrën vjollcë. Ndoshta nëse Boeri s’do e kishte propozuar për Italinë, me siguri që Rama do e përzgjidhte për fushatën e vaksinimit në Shqipëri, aq më tepër kur kjo përkon edhe me ngjyrën e PS-së.
Projekti i Boerit është publikuar ne faqen zyrtare në internet të arkitektit, ku thuhet ndër të tjera se ai e ka bërë falas për autoritetet shëndetësore italiane. Logo e kësaj fushate është publikuar në faqen arkitektit dhe në kanalin e tij në YouTube më datë 16 dhjetor 2020. Kjo nuk është hera e parë që Rama kopjon projekte të tilla. Kujtoni kohë më parë se si ai kishte kopjuar nga Gjeorgjia projektin e aeroportit të Kukësit.
©LAPSI.al
