Takimi i delegacioneve Greqi-Turqi, që u rikthyen në tryezën e bisedimeve pas afro 5 vitesh, ka përfunduar pas 3 orësh.
Lajmi raportohet nga mediat helene që nuk japin detaje se çfarë kanë diskutuar palët. Pritet që diplomatët grekë të largohen nga Stambolli në orën 15:00 (me orën greke).
Mësohet se delegacioni grek drejtohej nga Pavlos Apostolidis, një diplomat karriere me përvojë.
Delegacioni turk drejtohej nga zëvendësministri i Jashtëm Sedat Onal dhe Cagatay Erciyes, kreu i departamentit të Ministrisë së Jashtme.
Zëdhënësi i qeverisë Christos Tarantilis në një konferencë për shtyp të mbajtur sot tha se: “Greqia po hyn në bisedime me qëllim të mirë dhe pret të njëjtën gjë nga pala turke”.
Ministria e Jashtme e Turqisë pritet të dalë me një deklaratë për shtyp lidhur me bisedimet. Nga viti 2002 deri në vitin 2016, dy anëtarët e NATO-s zhvilluan 60 raunde bisedimesh, ku shënuan pak përparim.
Marrëdhëniet mes dy vende kanë qenë shumë të tensionuara kohët e fundit, pasi Ankaraja nisi kërkimet për gaz natyror në Mesdhe.
