Kryeministri i vendit, Edi Rama ndodhej në Durrës këtë të martë ku zhvilloi një takim me qytetarët, lidhur dhe me situatën e rindërtimit. Kryeministri u është përgjigjur të gjithë akuzave të opozitës se po shpërdorohen lekët të mbledhura nga konferenca e donatorëve, të organizuar nga Bashkimi Europian në Bruksel, ku pjesëmarrësit ishin nga e gjithë bota. Gjithsej 100 shtete që u bënë bashkë për të ndihmuar rindërtimin e Shqipërisë nga tërmeti.
Rama thotë se këto ndihma të dhëna nga këto vende nuk i janë dhënë qeverisë shqiptare por menaxhohen nga vetë këto vende.
“Sigurisht që bota na ndihmoi shumë. BE bëri një gjest për ne që është shumë i rrallë. Kemi pasur konferencën më të suksesshëm të donatorëve krahasuar me raste të ngjashme. Besoj se edhe për këtë një meritë e kemi, por të gjitha çfarë keni parë deri tani, shtëpi, shkolla, kopshte, çerdhe, nuk janë ndërtuar me lekët e botës, por me lekët e buxhetit të shtetit shqiptar. Programet e konferencës së donatorëve janë programe të tjera. BE që dha kontributin më të madh me 100 milionë euro do të ndërtojë pjesën tjetër të shkollave dhe do të ndërhyjë në trashëgiminë kulturore. Donatorë individualë kanë dhënë fonde për shkolla, përgjithësisht për shkolla. Të gjitha këto ata i bëjnë vet. Bota nuk ia jep lekët qeverisë shqiptare, lekët e veta i menaxhon vet. Shkollat që po ndërtohen në Durrës nga BE menaxhohet i gjithë projekti nga BE. Një fond i rëndësishëm është ai i Francës, që do të vijë në Durrës, për të gjithë projektin e kanalizimeve dhe ujësjellësin”, tha Kryeministri.
