Mjeku i QSUT, Edvin Prifti, i arrestuar pak ditë më parë në sallën e gjyqit, për shumën e parave që iu gjet në banesë, ka apeluar vendimin.
Në apelim thuhet se pasuria e mjekut Edvin Prifti është e ligjshme, se paratë e gjetura në banesë janë të bashkëshortes së tij, dhe se ai nuk ka bërë përpjekje për ta fshehur.
Arrestimi i kardiokirurgut/ Faji i mjekut apo i sistemit?
“Prifti kërkon shfuqizimin e vendimit për shkak të paligjshmërisë së procedurës dhe për mungesë të provave që e bëjnë të arsyeshëm dyshimin se zoti Edvin Prifti ka kryer veprën penale të pastrimit të produkteve të veprës penale”- thuhet në vendimin e zbardhur nga News 24.
Më tej, në apelim thuhet se “Ritheksojmë se një pjesë e të hollave (56.850 USD dhe 3.395.000 lekë) nuk u gjetën në zyrën e tij, por pas kontrollit vetjak, në çantën e tij të lap-topit, i cili në thelb është një akt i paligjshëm, sepse gjykata nuk kishte disponuar me vendim për kontrollin e tij personal”.
SPAK i gjeti mjekut Edvin Prifti në banesë dhe në zyrë 250 mijë euro dhe 160 milionë lekë (rreth 500 milionë lekë në total).
