Profesori amerikan i “John Hopkins University” dhe eksperti për çështjet e Ballkanit Perëndimor, Daniel Serwer është shprehur kundër vendimit që ambasada e Kosovës të vendoset në Jerusalem.
Në një intervistë për “RTV Dukagjini”, Serwer ka përdorur një gjuhë të ashpër ndaj ish-emisarit për dialogun Kosovë-Serbi, Richard Grenell, duke e quajtur “budalla”. Atë e fajësoi edhe për rrëzimin e qeverisë Kurti, duke shtuar se qeveria e re nuk e ka për detyrim që të zbatojë marrëveshjen e arritur në Washington.
“Unë personalisht preferoj që ambasada të mos vendoset në Jerusalem – gjëja kryesore është njohja nga Izraeli, kjo ia vlen diçka. Grenell nuk e pëlqen Kurtin sepse ai këmbënguli saktësisht në reciprocitet në marrëdhëniet me Serbinë, megjithëse ai gjithashtu tregoi një farë fleksibiliteti mbi tarifat.
Grenell është një budalla. Ai punoi shumë për ta hequr Kurtin nga kryeministria herën e fundit. Kjo e ndihmoi Kurtin të arrijë një fitore të madhe. Kritikat nga çdo qeveri e huaj nuk janë të rëndësishme për vendimin që duhet ta marrë Kosova.
Është shumë pozitive që Izraeli dhe Kosova po vendosin marrëdhënie diplomatike. Sa i përket ambasadës kjo i takon Kosovës, se ku dëshiron ta vendosë dhe se Kosova nuk duhet të nxitohet për të marrë një vendim” – shprehet ai.
