Partia “Lidhja Demokratike e Kosovës” nuk do e bojkotojë seancën për votimin e Vjosa Osmanit si presidente të Republikës. Grupi parlamentar i LDK-së njoftoi se synon të mbetet forcë konstruktive e opozitës dhe nuk do të luajë me stabilitetin politik të Kosovës. Osmani deri tani ka të sigurta vetëm 58 votat e Lëvizjes Vetëvendosje e cila edhe e ka kandiduar për kryetare shteti, ndërsa pakica nuk dihet a do i japë edhe 12 votat e tjera që i duhen.
Shefi i ri i LDK-së, Lumir Abdixhiku, tha të martën se zgjedhja e presidentit është çështje serioze, ndërsa nga Vetëvendosja, Mimoza Kusari-Lila tha se votimi mund të mbahet nga dita e premte.
“Pas një diskutimi të hapur, të gjithë bashkërisht kemi marrë vendim që LDK nuk do të bëjë obstruksione në zgjedhjen e presidenti të vendit, dhe LDK të marrë pjesë në votimin për presidentin, ky është vendim i Kryesisë i votuar me shumicë absolute. Pres që secili deputet të respektojë vendimin e shumicës dhe pres që nga secili deputet të sillen si institucionalit dhe ta kapërcejnë veten dhe çfarëdo hidhërimi që mund të kenë”, deklaroi Abdixhiku.
