Propozimi i Lëvizjes Vetëvendosje për të ndryshuar me procedurë të përshpejtuar Ligjin për Zgjedhjet është rrëzuar nga Kuvendi i Kosovës në një seancë urgjente që u zhvillua mbrëmjen e së premtes. Ligji u miratua me urgjencë gjatë pasdites në Komisionin Legjislativ, por nuk ka arritur të shmangë procedurat dhe të kalojë në Kuvendin e Kosovës.
Që ligji të miratohej me procedurë të përshpejtuar duhet të merrte 2/3 e votave, pra 69 të tilla, por në favor të propozimit të qeverisë së Albin Kurtit kanë votuar vetëm 65 deputetë ndërsa 35 të tjerë kanë votuar kundër. Tashmë ligji do të duhet të kalojë sipas procedurave të zakonshme parlamentare.
Ligji parashikon që emigrantët mund të votojnë në konsullatat e Kosovës dhe jo me postë siç kanë votuar edhe në zgjedhjet e fundit. Por aty ka pasur edhe një ndryshim tjetër sipas të cilit theksohet se “ndalohet garimi në zgjedhje vetëm nëse një person është dënuar me vendim të formës së prerë me burg në 3 vitet e fundit” duke hequr variantin e deritanishëm ku kishte një përcaktim më të gjerë se “ndalohej garimi për personat e dënuar me vendim të formës së prerë në 3 vitet e fundit". Ishte ky nen që e ndaloi Kurtin të garonte për deputet në zgjedhjet e 14 shkurtit.
Ky ishte ligji i parë që Vetëvendosje solli në Kuvend duke argumentuar se ishte premtimi që Albin Kurti i kishte bërë diasporës. Për fat të keq ishte edhe dështimi i parë i Kurtit në Kuvend.
Procedura e kërkuar nga partia që qeveris vendin shkaktoi një reagim të fortë të opozitës. LDK, PDK dhe AAK e konsideruan të papranueshëm shmangien e procedurave dhe nxitimin e Vetëvendosjes dhe madje kërcënuan se vendi mund të shkojë sërish në zgjedhje të parakohshme.
Vetëvendosje refuzoi kërkesën e kreut të LDK-së, Lumir Abdixhiku për ta tërhequr iniciativën dhe se në këtë mënyrë ajo po rrezikonte edhe zgjedhjen e Presidentit të ri duke detyruar deputetët e saj të mos qëndrojë në sallë, ashtu siç kanë premtuar. ©LAPSI.al
