Arben Pëllumbi, Sekretar Organizativ i Partisë Socialiste është munduar të justifikojë skandalin me databazën e të dhënave personale që forca e tij politike po përdor për fushatë elektorale. Në një intervistë në “Opinion” ai mohoi që lista e publikuar në lapsi.al të jetë e PS-së sepse sipas tij “atë nuk e ka parë kurrë" dhe se lista e socialistëve "nuk përmban të dhëna private”.
“Në përgjithësi përpara çdo fushate elektorale, të gjitha strukturat me listën e zgjedhësve që publikohet paraprakisht, dalin në terren dhe punojnë duke identifikuar derë me derë votuesit, duke trokitur derë më derë me pyetje që lënë të kuptojnë përkatësinë politike.
Ata që dalin janë të rinj të strukturave që duke trokitur derë në derë sjellin një lloj censusi. Nuk e di çfarë është kjo pamje, por gjithsesi nuk bëhet fjalë për ID, por për përcaktime të preferencave të votuesve”, - tha Pëllumbi.
Pëllumbi shpjegoi më në fund edhe rolin e "patronazhistit".
“Patonazhist është person i strukturave tona që merr përsipër duke trokitur derë më derë për të marr informacione. Ai është patronazhist i votave socialiste. Bëhet një census dhe identifikohen të gjithë qytetarët që na përgjigjen. Në përgjithësi janë të dhëna të grumbulluara që nga viti 2005 në PS. Nuk janë të dhëna të sigurta”, - u justifikua ai. ©LAPSI.al
