Ministrja për marrëdhëniet me parlamentin, Elisa Spiropali pranon se Partia Socialiste ka një databazë me të dhënat e votuesve por tregon se informacionet nuk janë publikuar nga e majta. Spiropali ishte sot e ftuar në Top Talk, ku gazetari, Denis Dyrnjaja e pyeti si kanë dalë të dhënat e tij personale, duke përfshirë kartën e identitetit dhe numrin e celularit.
Spiropali: Ne thjesht i evidentojmë votuesit. Nuk i ndikojmë dot, as nuk i çojmë në qendra votimi të na votojnë.
Gazetari: Përdoret numri i telefonit, përdoret kodi i kartës së identitetit dhe këto janë të dhëna personale
Spiropali: Jo, ne nuk i përdorim askund. Unë nuk di të them si e qysh i ka botuar një portal apo disa portale, ata mbajnë përgjegjësi për botimin. Në, që nga viti 2008 kemi një databazë që përditësohet
Gazetari: Le ta bëjmë më ilustrive, del emri im, mbiemri im, atësia, numri i telefonit dhe ID-ja, qendra e votimit dhe thuhet aty, votues i sigurt. Unë ndërkohë nuk votoj fare!
Spiropali: Po, pikërisht
Gazetari: Po ç’punë kanë të dhënat e mia?
Spiropali: Ja këtu, ty të paskemi marrë gabim, se një aktivist i joni mendon se ti voton PS-së por ndërkohë nuk është kështu. Por ama, si të ndikon ty kjo, ne nuk të ndikojmë!
Gazetari: Më ndikon, se më sugjestionon. Unë dua të votoj PS-në tani, nuk e votoj dot se them më paragjykojnë njerëzit që po votoj Partinë Socialiste.
Sipas Spiropalit, është normale, kudo në botë, që partitë politike të kenë databazë me të dhënat e votuesve.
