PDK-ja mendon se kryeministri Albin Kurti nuk po e drejton mirë vendin, ndaj dy muaj pas zgjedhjeve, po synon protesta kundër tij. Sekretari organizativ i PDK-së, Betim Gjoshi, thotë se partia e dytë në vend synon të rritë edhe ndikimin politik në betejat parlamentare.
Partia Demokratike e Kosovës, grupimi më i madh opozitar në shtetin fqinj, pritet të përdorë të gjitha mjetet demokratike për të kundërshtuar qeverinë e kryeministrit, Albin Kurti.
Anëtari i kryesisë së PDK-së, Betim Gjoshi, mendon se gjatë këtyre tri javëve pushtet, Kurti ka treguar se nuk është i aftë të qeverisë.
“Mungesa e programit tregon se ata janë njerëz pa përvojë politike dhe tregon që nuk kanë pasur ndonjë ndjesi për interesin e qytetarëve. Ata me një politikë kanë arritur tek fitimi i rezultatit zgjedhor duke realizuar pakënaqësinë qytetare, por nuk kanë pasur një ofertë të mirë për qytetarët dhe ajo që e kemi thënë gjatë fushatës zgjedhore po argumentohet edhe sot.”
PDK-ja sheh protestat si mundësi reagimi ndaj qeverisë, por edhe përballjen në parlament për nisma që rrezikojnë kapjen e pushteteve.
Një nga këto nisma është propozimi për të konfiskuar pasuritë e paligjshme të zyrtarëve.
“Të ruhet pavarësia e gjyqësorit, prokurorisë dhe funksionimi i institucioneve për ndarje të pushteteve për të mos kaluar në arbitraritet … dhe mos të përdorët për hakmarrje politike dhe mbylljen e gojës opozitës, shoqërisë civile dhe mediave.”
Opozita nuk e votoi Vjosa Osmanin për presidente dy javë më parë, dhe Gjoshi, si sekretar organizativ i PDK-së, thotë se partia e tij vazhdon ta konsiderojë Osmanin person përçarës dhe jo të duhurën për kreun e shtetit.
“Ne të gjithë e dimë se ajo ka qenë kundër edhe atyre që e kanë ngritur në karrierë. E ka shkatërruar edhe partinë e vet politike dhe ne nuk kemi pritur më shumë. I ka përçarë edhe qytetarët e Kosovës me deklaratat e saja nxitëse. Në gjithë karrierën e saj ka folur më shumë kundër Hashim Thaçit se ndaj Sllobodan Millosheviqit.”
