Në shtator të vitit 2019 Komisioni Qëndror i Zgjedhjeve i hoqi mandatin deputetit të Peqinit, Aqif Rakipit, i njohur ndryshe si Qifja. Ai fshehu një emër tjetër që e kishte përdorur në Itali shumë vite më parë dhe një problem me autoritet italiane, për ca sende të vjedhura.
Rakipi vinte nga radhët e PDIU-së dhe i mohoi akuzat, madje e ankimoi vendimin në gjykatë. Gjithsesi, nga parlamenti Aqif Rakipi u largua për shkak të letër-porosisë nga Italia, por marrëdhënia me Edi Ramën nuk u cënua. është e njohur tashmë afërsia e Aqif Rakipit me familjarët e kryeministrit Rama dhe në parlamentin e ardhshëm, ai rikthehet përmes të afërmve të tij, jo me një, por me dy vota.
Në Tiranë ka kandiduar Ornaldo Rakipi, djali i Aqif Rakipit në vendin e 30 në listën e Partisë Socialiste dhe sot ai ka thyer herësin, duke u katapultuar mes fituesve. 27 vjeçari rezultoi si një nga kandidatët më të preferuar nga banorët e Vorës, Gërdecit, Marqinetit dhe një sërë fshatrash në rrethinat e Tiranës. Emri i tij renditet mes ministrave në preferencën e votuesve.
Një tjetër “gjetje” e PS-së është Saimir Hasalla, kandidat për deputet në Elbasan, që njihet si bashkëshorti i mbesës së Aqif Rakipit. “Dhëndëri” i Aqif Rakipit me mbështetjen e tij ka thyer herësin duke marrë më shumë se 10 mijë vota dhe duke u renditur në listën fituese të deputetëve të Elbasanit për Partinë Socialiste. Saimir Hasalla ka qenë edhe kryetar i Bashkisë së Peqinit, një zonë me ndikim të fortë nga Aqif Rakipi.
Pakti mes Ramës dhe Qifes rezulton fitues në dy qarqe. Ish-deputeti i PDIU-së ia ka shpërblyer besimin e kryesocialistit me një fushatë që ndoshta nuk ka bërë shumë zhurmë, por ama “herësin” e ka bërë copa edhe në Tiranë, edhe në Elbasan.©Lapsi.al
