Danimarka, vendi i parë në Evropë që ndërpreu vaksinën AstraZeneca për Covid-19 në Prill, njoftoi sot se do të bënte të njëjtën gjë për vaksinën Johnson & Johnson për shkak të efekteve të mundshme anësore.
Si Agjencia Evropiane e Barnave (EMA) ashtu edhe Organizata Botërore e Shëndetësisë i kanë dhënë “dritën jeshile” kësaj vaksine.
“Autoriteti Kombëtar Shëndetësor Danez ka arritur në përfundimin se përfitimet e përdorimit të vaksinës Johnson & Johnson për Covid-19 nuk tejkalojnë rrezikun e një efekti anësor të mundshëm, VITT (një lloj shumë i rrallë i trombozës) tek njerëzit që marrin vaksinën.
Si rezultat, programi danez i vaksinimit masiv për Covid-19 do të vazhdojë pa vaksinën Johnson & Johnson” thuhet në deklaratë. Sot, katër vaksina kundër Covid-19 përdoren në Evropë: Pfizer-BioNTech, Moderna, AstraZeneca dhe Johnson & Johnson.
