Partia Demokratike deklaroi sot të tjera raste që sipas kësaj force politike tregojnë shkelje të ligjit gjatë zgjedhjeve të 25 prillit.
Përfaqësuesi i selisë blu në Komisionin e Ankimimeve dhe Ankesave, (KAS) kërkoi sot përsëritjen e zgjedhjeve në Berat.
Përveç blerjes me 50 mijë lekë të votës, blerjes së kuponave për karta identiteti në qarkun e Beratit nga PS, Partia Demokratike paraqiti edhe prova të tjera që sipas saj mbështesin kërkesën për pavlefshmërinë e zgjedhjeve në qarkun e Beratit.
Deklarata
Vendimi i PS në Këshillin Bashkiak për shpërndarjen e 10 milionë lekëve për tërmetin në prag të zgjedhjeve. Ky fond nuk ishte parashikuar në buxhetin e bashkisë për këtë vit, por u shpërnda si mënyrë për të blerë vota.
PS në Këshillin Bashkiak të Beratit shtyu pagesën e këstit së taksave dhe tarifave deri pas zgjedhjeve. Edhe ky konsiderohet një akt që vendos shtetin në shërbim të PS për të ndikuar në rezultat.
Kapja e furgonit me ndihma nga Rezervat e Shtetit 1 javë përpara zgjedhjeve është provë e përdorimit të burimeve shtetërore për zgjedhjet për të ndryshuar rezultatin
Presioni i nëpunësve civilë për të gjetur secili 30-50 vota për PS-në këmbim të vendit të punës.
Vendimi për shtimin e numrit te punonjësve të Bashkisë Berat me 16 persona.
Diferenca e votave për mandatin e 5-te të PS është 77 vota me LSI, ndërkohë që ka 5292 fletë të pavlefshme ose 6.54%.
