Shumë avantazhe për skuadrën e Superiores ndaj rivalit që vinte nga Kategoria e Parë. Sikur të mos mjaftonte diferenca e një niveli kompetitiv, Kastrioti luante edhe në shtëpi ndeshjen e playout kundër Tomorit që kishte fituar finalen e vendeve të dyta në grupet e Kategorisë së Parë, duke e mbyllur ndeshjen 2-1. Keqardhje e beratasve të Sinellës për traversën e Cankës që mund të kishte ndryshuar rrjedhën e lojës.
Në fund të 90 minutave emociouese në Kamëz, Kastrioti arriti të sigurojë zyrtarisht qëndrimin në Superiore për sezonin e ardhshëm, duke shpëtuar kështu sezonin, që ishte komplikuar me shpenzimin e një diference të konsiderueshme pikësh, deri në mbylljen e kampionatit në zonën playout. Një gol i Mehmetit në minutën e 45 dhe Rezit në minutën 63, i dhanë një fitore shumë të rëndësishme skuadrës së Ndreut.
Të besuarit e Sinellës ngushtuan shifrat në minutën e 93, duke shënuar me Qaton, por që vlejti vetëm për statistikë. E gjithë keqardhja e beratasve është traversa e minutës së 43, e goditur nga Canka me rezultatin 0-0, ndërsa në pëmbysjen e fronteve Mehmeti zhbllokoi sfidën.
