Tre persona janë vënë në pranga dhe dy të tjerë janë shpallur në kërkim në kuadër të një operacioni për parandalimin dhe goditjen e tentativës për kultivim të bimëve narkotike. Burime zyrtare nga policia e Elbasanit bënë me dije se bëhet fjalë për shtetasit me inicialet M. B., 32 vjeç, D. B., 39 vjeç, banues në Elbasan dhe F. G., 47 vjeç, banues në Krrabë e Madhe, Tiranë.
Si dhe janë shpallur në kërkim dhe po punohet për kapjen e shtetasve: L. B., 30 vjeç dhe I. B., 83 vjeç, banues në fshatin Krrabë e Vogël.
Arrestimi i këtyre shtetasve dhe shpallja në kërkim e bashkautorëve u bë pasi kanë tentuar për të kultivuar fidanë kannabis sativa në një zonë të pyllëzuar në fshatin Krrabë e Vogël.
Gjatë kontrollit të ushtruar nga shërbimet e Policisë në banesën e shtetasit me inicialet I. B. janë gjetur dhe sekuestruar në cilësinë e provës materiale 26 fishekë dhe fara kanabisi.
Materialet hetimore i kaluan Prokurorisë pranë Gjykatës së Shkallës së Parë Elbasan, për veprime të mëtejshme procedurale.
