Vëllait të papunë i jepte 300 euro në muaj, por sërish ai e ka vrarë. Fundi tragjik i Diana Vukajt në Shkodër është zbuluar natën e kaluar, kur trupi i saj u gjet nga policia 3 ditë pasi ishte qëlluar me armë nga Fabian Vukaj, i vëllai.
Diana sapo ishte kthyer nga Gjermania ku qëndronte për të punuar dhe ishte përfshirë në një konflikt me Fabianin për çështje pronësie.
Fillimisht kanë qenë fqinjët e viktimës që dyshuan për zhdukjen e saj, pasi kishin ditë që nuk e kishin parë 58-vjeçaren në shtëpi, në lagjen “3 heronjtë” në Shkodër. Në të njëjtën shtëpi jetonte edhe vëllai i saj. I pamartuar dhe i papunë, ai jetonte me paratë që i sillte e motra.
Dyshimet janë se 55-vjeçari kërkonte nga motra e tij paratë të cilat ajo i kishte ruajtur për mobilimin e një shtëpie në Velipojë. Fabiani ankohej se 300 eurot nuk mjaftonin, ndërkohë që shpesh konsumonte alkol apo luante kumar. Tre ditët e fundit, ndërsa trupi i pajetë i së motrës ishte në një nga dhomat e shtëpisë, ai kishte vazhduar rutinën e përditshme në përpjekje për të mos u zbuluar nga fqinjët. Ata treguan se e kishin parë të lëvizte me biçikletë apo të luante bilardo si zakonisht në lagje.
Policia e gjeti gruan e vdekur të shtrirë në krevat, ndërsa në dhomë u gjetën pistoleta dhe gëzhojat e plumbave me të cilën e kishte qëlluar Fabiani.
Diana Vukaj është e fundit nga një radhë e gjatë grash që humbin jetën nga familjarët apo të njohurit e tyre burra. Në datën 6 maj, shokoi historia e Liljana Buzos, e cila u vra me një breshëri plumbash nga bashkëshorti i saj Koço Buzo në dalje të Gjykatës së Elbasanit. Në 10 Prill, në Kavajë Bilbil Shirja rrahu dhe më pas dogji të gjallë bashkëshorten e tij Fëllënza Shirja, 45 vjeç.
Në Fier, Demokrat Medinaj vrau bashkëshorten e tij shtatzënë, Irvana Hyka, duke e goditur 31 herë me thikë, ndërsa natën e ndërrimit të viteve në Tiranë, Përparim Tela vrau dy motrat Zhaneta Metani dhe Kristina Bardhi.
