Në fund, buzëqesh Challandes. Skuadra e teknikut zviceran rrëmben një fitore 0-1 në transfertën e Gjeorgjisë, duke u ngjitur përkohësisht në vendin e 3 me tre pikë në po kaq ndeshje të luajtur. Për Dardanët është fitorja e parë historike në fushatën kualifikuese të një Botërori që nga krijimi.
Pas dy humbjeve të para dhe një serie rezultatesh e performancash që kishin tronditur moralin e kombëtares së Kosovës, në Gjeorgji të besuarit e Challandes dolën mbi vështirësitë për të marrë një rezultat tepër të rëndësishëm. Vedat Muriqi, lojtari që nuk gjen minuta që kur ka kaluar te Lazio, imponohet në zonë në minutën e 18, duke detyruar mbrojtësin në markaturë të devijojë krosimin e Berishës në portë, për autogolin më klasik.
Kosova pati impaktin më të mirë me ndeshjen, kontrolloi lojën dhe krijoi shumë mundësi shënimi, por rrezikoi jo pak, sidomos në minutën e 57 kur në ndihmë i erdhi traversa. Edhe pse me mungesa të shumta, ku spikasnin emrat si Rashica, Zhegrova, apo Zeneli, përfaqësusesja dardane luajti me personalitet dhe madje shënoi edhe golin e dytë në minutën e 83 nga Rashani, por VAR e anulloi për pozicion jashtë loje.
Kosova, me tre pikë pas tre ndeshjesh në Grupin B, kalon Greqinë e Gjeorgjinë e vihet në ndjekje të Spanjës e Suedisë, dy skuadrat që e kanë mundur në dy sfidat e para të grupit në rrugën drejt Katar 2022.
